• Blod er i mange tilfelle heilt nødvendig for å kunne redde liv.
• Blod er eit levande materiale som ikkje blir produsert, det må gjevast
• Blod er ferskvare og har begrensa haldbarheit, difor er det konstant behov for nye forsyningar.
• Blodoverføring er ein uerstatteleg del av moderne medisinsk behandling, utan blod vil liv gå tapt.

I dag gir berre ca 2 % av folk i Noreg blod. 50 % av oss vil i løpet av livet ha behov for blod eller produkt laga av blod. 

Ei rekkje pasientgrupper har behov for blod eller produkt laga av blod.

Kreftpasientar: Nesten 50% av blodprodukta blir brukte til behandling av pasientar med kreftsjukdom. Både sjukdommen i seg sjølv og behandlinga som kreftpasientane får, gjer at dei har stort behov for tilskot av blodprodukt.

Ulukker og operasjonar: Liv hadde gått tapt om blodbankane ikkje hadde hatt blod på lager. Ei einaste trafikkulukke kan kreve at opptil 50 personar har gitt blod.

Brannskadar: Brannskadar kan krevje mykje blodprodukt, spesielt plasmaprodukt for å hjelpe med tilhelingsprosessen. Omfattande brannskadar kan krevje blod fra meir enn 100 blodgivarar.

Fødande og nyfødde: Både fødande og nyfødde kan ha behov for blodprodukt i forbindelse med fødsel.  Det finst også tilfelle der fosteret har fått blodoverføring i mors liv.

Blodsjukdommar: Personar med blødersjukdom manglar ein eller fleire koagulasjonsfaktorar i blodet sitt. Utan denne faktoren kan det oppstå alvorlege blødingar. Blodbankane framstiller koagulasjonsfaktorar av blod. Personar med visse anemitilstandar treng jamleg tilførsel av blod for å kunne leve.